اشتريت البيت علي البحـر ج 2حكـايات مني السيد حصري

نزلت إيلين درجات السلم بخطوات ثابتة، مكنتش مستعجلة، ولا كانت بتجري زي واحدة مكسورة أو بتهرب. صوت كعب جزمتها الرخيم على الرخام كان بيعمل صدى جوه عمارة المعادي الهادية، صدى بيشبه بالظبط كل الأوهام اللي اتكسرت جواها في لحظة واحدة. أول ما خرجت للشارع، ضرب وشها هوا القاهرة الرطب في ليل أول الصيف. بصت لساعتها؛ كانت داخلة على تسعة بالليل. الشارع مليان حركة، عربيات رايحة وجاية، ناس بتضحك ع القهاوي، ومحلات بتفرش بضاعتها. الدنيا ماشية عادي جدًا، ولا كأن في إنسانة لسه من خمس دقايق اكتشفت إن تلات سنين من عمرها وشقاها كانوا مبنيين على أرض هشة، وإن الراجل اللي كانت بتسهر تدفي ضهره مكنش أكتر من عيل متداري في ضل أمه. مراحتش مطعم تتعشى زي ما قالتلهم. رجليها خدتها لكورنيش النيل القريب، قعدت على كافيه هادي، طلبت فنجان قهوة سادة، وطلعت تليفونها. الشاشة نورت، وشافت صورة طارق وهي في خلفية التليفون؛ كان متصور معاها في دهب السنة اللي فاتت، بيضحك ورافع إيده بعلامة النصر، وهي جنبه فرحانة بيه وبضحكته. مسحت إيلين بإبهامها على الشاشة، وحست بوجع خفيف في زورها، بس الوجع ده بسرعة اتحول لصلابة. الغدر لما بيجي من غريب بيوجع، بس لما بيجي من أقرب الناس بيفوّق.. وإيلين كانت من النوع اللي لما بيفوق، بيحسبها بالورقة والقلم. فتحت النوتس وبدأت تراجع حساباتها: عقد إيجار الشقة باسمها هي.. التأمين طالع من حسابها هي.. عفش الشقة تلتينه شرياه بفلوس شغلها وفواتيره متوثقة على إيميلاتها.. قسط العربية اللي طارق راكبها مسحوب من حساب بنكي هي ضامنة فيه، وإيصالات الأمانة بتاعة صحابه لسه نسخة منها محطوطة في درج مكتبها. ضحكت بسخرية وهي بتبص لصفحة الحسابات: «كنت فاكرة إني بحميك وببني بيتنا.. طلعت بتسمن في قطة عشان تاكل صوابعك أول ما تجوع.» شربت قهوتها على مهل، وبصت للمايه السودة اللي بتلمع تحت أنوار الكباري. تليفونها مبطلش رن؛ في الأول كانت رنات طارق متتالية، سبع رنات ورا بعض.. بعدين مسجات: «إيلين ردي..» «إنتي فين؟ متزعليش، أمي مشيت خلاص والبيت فاضي زي ما طلبتي.» «إيلين متكبريش الموضوع، إحنا لازم نتكلم بالعقل.. إنتي فهمتي كلام أمي غلط والله.» وبعد رسايل طارق، جت رسالة من رقم أمه، الحاجة فايزة: «يا خسارة التربية يا بنت الناس، بقى عشان قرشين طالعين من دم قلب ابني تقفي في وشي وتقللي من هيبة الراجل؟ ربنا يهديكي وترجعي لعقلك قبل ما تلاقي نفسك في الشارع ومطلقة، وساعتها الفلوس مش هتعوضك ضل الحيطة اللي كان سترك!» إيلين مسحت الرسايل كلها ببرود تام، قفلت التليفون ورمته في الشنطة. دفعت الحساب، وقامت تمشي راجعة للبيت. الساعة كانت عدت حداشر ونص لما فتحت باب الشقة بالمفتاح. أول ما فتحت، شمت ريحة بخور تقيلة خنقة.. ريحة البخور اللي الحاجة فايزة دايمًا بتولعه عشان «تطرد العين والحسد». الشقة كانت هادية بشكل كئيب، بس النور بتاع الصالة كان والع، وطارق قاعد على الكنبة، حاطط راسه بين إيديه، وأول ما سمع صوت المفتاح اتنفض من مكانه وجري ناحيتها. «إيلين! اتأخرتي ليه كده؟ كنت هتجنن، تليفونك مقفول ليه؟» إيلين قلعت جزمتها وحطتها على الجنب، وعلقت شنطتها على الشماعة من غير ما تبصله: «تليفوني فصل شحن.. وأنا مكنتش حابة أسمع دوشة.» طارق مسك إيدها بلهفة، إيديه كانت متلجة وعرقانة: «حقك عليا.. أنا عارف إني غلطت، وعارف إن طريقة أمي كانت ناشفة شوية.. بس والله العظيم هي متعرفش حاجة عن شغلنا وتعبنا، هي ست قديمة وتفكيرها على قدها، فاكرة إن الراجل والست لما يتجوزوا كل حاجة بتدخل في بعضها..» إيلين بصت له بهدوء تام، سحبت إيدها من بين إيديه بالراحة ومشت ناحية المطبخ. دخلت، صبت لنفسها كباية مايه وشربت نصها، وطارق ماشي وراها زي ضلها، وشه مليان قلق وخوف حقيقي. «إنتي ساكتة ليه يا إيلين؟ اتكلمي، اصرخي، عاتبي.. قولي أي حاجة بس متسكتيش كده!» طارق صوته كان بيتهدج. لفت إيلين وشها ليه وسندت على رخامة المطبخ: «أقول إيه يا طارق؟ أقولك زعلانة؟ أنا مش زعلانة.. الزعل ده بيكون لما الواحد يتفاجئ بحاجة مكنش متوقعها. . بس أنا النهاردة شوفت الحقيقة اللي كنت عامية عنها تلات سنين كاملين.» «حقيقة إيه بس؟!» طارق قرب خطوة وتوسل: «أنا بحبك! إنتي مراتي وحبيبتي وشريكة عمري، عمري ما فكرت أطمع فيكي ولا في فلوسك!» «بجد يا طارق؟» ابتسمت إيلين بمرارة: «محبتك دي هي اللي خلتك تروح تقعد مع أمك تحسبوا هتاخدوا مني إيه؟ محبتك هي اللي خلتك تقف ساكت وهي بتقولك طلقها واكسر رقبتها عشان تاخد نص الشاليه ونرميها للمحاكم؟ محبتك هي اللي خلتك تهز راسك وتوافق إن هند وبناتها يروحوا يفرشوا في تعبي وأنا أقعد في الحر هنا أكد واشتغل عشان أصرف عليكم؟» طارق اتلخبط، عينيه بدأت تدمع من العجز: «أنا كنت بحاول أسايرها! إنتي متعرفيش أمي لما بتقفش بتعمل إيه، دي كانت هتقلب الدنيا على دماغي وتعملي فضيحة في العيلة! قولت أقولها حاضر وبعدين أراضيكي بيني وبينك.. مكنتش أعرف إنك سامعة!» «يعني لو مكنتش سامعة، كنت هتيجي بالليل تقنعني بلواية الدراع؟» سألته بصوت حاسم قاطع: «كنت هتيجي تقولي معلش يا إيلين عشان خاطري هند تروح، معلش يا إيلين عشان خاطر أمي اكتبيلي حتة من الشاليه عشان مايبقاش شكلي وحش؟ كنت هتبتزني بمشاعري وبحبي ليك لحد ما تاخد اللي هما عايزينه، صح؟» طارق سكت، معرفش ينطق. سكوته كان الاعتراف الصريح اللي ملوش أي تأويل. «طارق..» إيلين مشت بهدوء ناحية أوضة النوم، وفتحت الدولاب: «المسرحية دي خلصت خلاص.» لمحة نيوز طارق جرى وراها ودخل الأوضة، شافها بتسحب شنطة السفر الكبيرة من فوق الدولاب وبتحطها على السرير. اتخض ورجله خبطت في الكومودينو: «إيلين بتعملي إيه؟! إنتي هتسيبي البيت؟!» بصت له إيلين ببرود وهي بتفتح سوستة الشنطة: «أنا؟ لا يا حبيبي، أنا مسيبش بيت أنا دافعة إيجاره وساترة حيطانه.. الشنطة دي مش ليا.. الشنطة دي ليك إنت.» الكلمة نزلت عليه زي ضربة شومة. طارق برق بعينيه، ورجع خطوة لورا كأنه مش مستوعب الكلام: «ليا أنا؟! إنتي بتطرديني من بيتي يا إيلين؟!» «ده مش بيتك،» قالتها وهي بتفتح درف الدولاب وبتبدأ تاخد بدل شغله وهدومه وتطبقها وتحطها في الشنطة بسرعة واحترافية: «ده بيت مستأجر، العقد باسم إيلين عبد الرحمن، الفواتير بتدفعها إيلين، الإيجار بيطلع من فيزا إيلين. إنت هنا كنت ضيف.. وأنا بصراحة كرم الضيافة عندي خلص النهاردة.» طارق اتهور، جرى ومسك دراعها بعنف، حاول يشد الهدوم من إيدها: «إنتي اتجننتي؟! طرد إيه وهبل إيه؟! أنا جوزك، فاهمة يعني إيه جوزك؟! ده بيتي زي ما هو بيتك، ومفيش راجل بينطرد من بيته عشان مراته اتمردت ومعاها قرشين!» إيلين وقفت مكانها، وبصت في عينيه بقوة غريبة خلت إيده ترتخي تاني: «طارق، إنت لو فاكر إن الصوت العالي والبلطجة دي هتمشي معايا تبقى لسه متعرفنيش. أنا لحد دلوقتي بلم هدومك بالذوق وبحترام للعيش والملح اللي بينا. لو فكرت تلمسني أو تعلي صوتك عليا تاني، البوليس هيكون هنا في ظرف خمس دقايق، وبدل ما تخرج بشنطة هدومك محترم، هتخرج مكلبش ومتبهدل. وأنا معنديش أغلى من كرامتي عشان أخاف من الفضايح.. الفضايح دي تخاف منها إنت وأمك اللي همكم الناس والعيلة.» طارق اتكسر تمامًا، قعد على طرف السرير، وحط وشه في كفوفه وبدأ يعيط، عياط راجل حاسس إن كل حاجة بتنهار تحت رجليه: «ليه كده يا إيلين؟ ليه بتهدي كل حاجة في لحظة؟ عشان غلطة؟ عشان أمي قالت كلمتين في لحظة غضب؟ فين الحب؟ فين السنين اللي عشناها؟» إيلين مكنتش بتبص له وهي بتكمل تلم الهدوم، بس صوتها كان فيه حزن عميق، حزن ناضج مش بتاع عيال: «الحب مات لما شوفت راجلي واقف ساكت قدام أمه وهي بتقلل من مراته وبتقسم شقاها. الحب مات لما حسيت إنك مستكتر عليا فرحتي، وإن أول ما بقى عندي حاجة حلوة في حياتي، شوفتوا إزاي تنهبوها وتوزعوها على قرايبكم بحجة الأصول والعشم. أنا مش بنك مفتوح للسحب، ولا أنا درع يحميك من مسؤولياتك، ولا أنا شاحنة بتجر وراها عيلتك كلها وإنت قاعد بتتفرج.» قفلت إيلين سوستة الشنطة الأولى، وسحبت شنطة تانية أصغر حطت فيها جزمته وساعاته وحاجاته الشخصية. طلعت كل حاجة تخصه في أقل من نص ساعة، كأنها بتمسح وجوده من الأوضة بأستيكة. وقفت قدامه ورمت المفاتيح الاحتياطية على السرير: «الشنط جاهزة. مفاتيح الشقة دي تسيبها هنا.. وعربيتك، بما إنك راجل وليك هيبتك ومش شحات عندي زي ما قولت في المطبخ، قدامك تلت أيام بالظبط، تروح البنك تنقل القرض باسمك أو تسدد الباقي منه، لأني بكره الصبح هسحب ضمانتي من البنك رسمي، والبنك هيتصرف معاك.» طارق رفع راسه، عينيه حمرا ومورمة: «عايزة تخربيها رسمي يعني؟ عايزة تدمريني؟» «إنت اللي دمرت نفسك لما سلمت ودانك لأمك، ولما فكرت إن سكوتي وطيبتي دول ضعف.. اخرج يا طارق، وبكرة المحامي بتاعي هيتواصل معاك عشان ننهي كل حاجة في هدوء.. ورقة طلاقي توصلي على عنوان أهلك، وبالمعروف زي ما دخلنا بالمعروف.» طارق وقف، بص للشنط، وبص للأوضة اللي كانت شاهده على تلات سنين من حياتهم. حاول يدور في وشها على أي بادرة تراجع، على أي نقطة ضعف ممكن يلعب عليها، بس ملقاش غير جدار عازل من البرود التام. أدرك في اللحظة دي إن كل محاولاته فشلت، وإن الست اللي قدامه دي خدت قرارها خلاص ومفيش فيه رجعة. شال الشنطتين بقلة حيلة، وخرج للصالة، وصل عند باب الشقة ووقف وبص وراه: «هتندمي يا إيلين.. هتندمي لما تلاقي نفسك لوحدك في الدنيا دي، الفلوس والشغل مش هيونسوكي.» ابتسمت إيلين وهي ماسكة الباب عشان تقفله وراه: «الوحدة في سلام أحسن ميت مرة من الونس في بيت مليان طمع وغل يا طارق.. مع السلامة.» رزعت الباب؟ لأ.. قفلته بهدوء تام، ولفت المفتاح في الكالون تكتين، وسندت ضهرها ع الباب وأخدت أول نفس عميق وكامل من تلات سنين. عدى أسبوعين على الليلة دي. أسبوعين كانوا كافيين عشان العاصفة تضرب وتهدا. الحاجة فايزة طبعًا محلتش، راحت لعيلة إيلين ولفّت على معارفهم تقول إن إيلين طردت جوزها وسرقت فلوسه وعينها فارغة، وإنها بتجري ورا محاكم الأسرة.. بس أهل إيلين كانوا عارفين بنتهم وعارفين معدنها، ولما شافوا كشوفات الحسابات وتفاصيل الديون اللي سدتها عن طارق، طردوا الحاجة فايزة من بيتهم بالذوق وقفلوا الباب في وشها. وطارق، أول ما حس بالضغط والجدية، وبإن البنك هيدخل يحجز على العربية وإنه هيتفضح في شغله، وافق على الطلاق على طول من غير شوشرة، ووقع على التنازل عن كل حاجة مقابل إن إيلين تسيب له تمن تسديد القسط الأخير كجدعنة وأصل منها عشان ميتحبسش. في يوم جمعة مشمس في أواخر شهر يونيو، كانت إيلين سايقة عربيتها على طريق الساحل الجديد. الشمس كانت طالعة ذهبية دافية، الشارع واسع وفاضي قدامها، والشباك موارب بيدخل ريحة يود البحر المنعشة. على الكرسي اللي جنبها كانت حاطة شاشات الجرافيك الجديدة وجهاز اللاب توب القوي اللي اشترته مخصوص عشان مشاريعها الكبيرة اللي جاية، وفي شنطة العربية كانت حاطة ستاير بيضا خفيفة وشوية أباجورات ومفارش اشترتهم عشان تفرش شاليه أحلامها. وصلت عند بوابة القرية، الأمن فتحلها البوابة بابتسامة ترحيب: «حمد لله على السلامة يا فندم.» «الله يسلمك.» ردت بابتسامة حقيقية طالعة من نغاشيش قلبها. ركنت العربية قدام الشاليه الصغير. شافت حيطانه البيضا بتلمع تحت الشمس، وشجر العنب والجهنمية البنفسجية مفروش على السور زي ما كان في خيالها بالظبط. طلعت المفتاح اللي متدلي منه الهلب البحري الصغير، فتحت الباب، ودخلت. البيت كان هادي، نقي، ومفهوش ريحة نفاق ولا كلام في الأصول المزيفة. فتحت الواجهة الزجاجية الكبيرة بتاعة التراس، خرجت وقفت وسندت إيديها على السور الخشب، وبصت للبحر الأزرق اللي ممتد لحد ما تلتقي المايه بالسما. صوت تلاطم الموج كان بيملى المكان، مش من سماعات لاب توب قديم، ولا في مطبخ ضيق معتم في نص الليل.. الصوت كان حقيقي، البحر كان حقيقي، وحريتها كانت أكتر حاجة حقيقية عاشتها في حياتها. غمضت إيلين عينيها، وابتسمت، وهي عارفة إن الحكاية اللي انتهت مكنتش خسارة.. الحكاية كانت درس، وإن بكرة اللي جاي، هي اللي هتكتبه وترسمه على نضيف، على شاطئ أبيض ملكها لوحدها. النهاية

مقالات ذات صلة

بعد ٣ أيام بس من جوازي ج 3 حكايات منــال عـلـي

الشيخ

سمعت جوزي حكايات رومانى مكرم، 1

مرتب زوجى حكايات زهرة

كرامتي و كفي بقلم منــال عـلـي

ج1 مكائد اخت مراتي

اترك تعليقاً إلغاء الرد