فرح سيلفى ج 2حكـايات مني السيد حصري

الكلام لسه مخلصش، وفجأة لقينا حماتي جاية زي الطوفان، لابسة فستانها المنفوش اللي مالي السكة وعينيها بتلمع بالغضب، حست إن السر اللي حاولت تداريه ورا الضحكات والزغاريد بدأ يتكشف، وقفت في وسطنا ووشها اتحول لكتلة غضب وقالت بصوت خشن وواطي عشان المعازيم ميسمعوش: “واقفين هنا بتوسوسوا في إيه؟! سايبين الناس وبتهببوا إيه جنب الكوشة؟! وإنت يا عريس سايب عروستك لوحدها ليه على الكوشة والمعازيم بيبصوا عليك؟!”

العريس بصلها بجمود أول مرة يشوفوه فيه، نبرته اتغيرت وبقت حادة جداً وقال: “أنا واقف بفهم يا أمي، بفهم الفلوس اللي أخدتيها مني على أساس إن البنات ضيعوها راحت فين؟ وبفهم ليه سلايفي داخلين الفرح متبهدلين كده وإنتِ مجهزة نفسك على سنقة عشرة بفلوسي وتتهميهم بالسرقة؟”

حماتي اتفاجئت، بس من مكرها حاولت تلعب اللعبة المعتادة، مسكت قلبها

وبدأت تتنفس بصعوبة وتعمل نفسها دايخة وهتقع: “آه يا قلبي! بقى بعد العمر ده كله وجاي تعاتبني على قرشين يوم فرحك عشان خاطر الغرب؟! أنا اللي ربيت وشقيت، بقى الحريات دول يوقعوا بيني وبينك في ليلة عمرك؟!”
سلفتي مطلعتش سهلة، ووقفت قدامها وقالت بأعلى صوتها: “مفيش تعب ولا تمثيل هينفع النهاردة! إحنا معانا الفواتير ومعانا كل حاجة، ومعانا رسايل الكوافير اللي طردتينا منه بعد ما دفعتي لنفسك وأخدتي باقي الفلوس في شنطتك! الشنطة اللي في إيدك دي فيها باقي الأمانة اللي قولتيلهم إننا سرقناها!”

القاعة بدأت تهدى شوية، وناس من المعازيم القريبين بدأوا يقفوا على طراطيف صوابعهم يشوفوا إيه اللي بيحصل جنب البوفيه، وأم العروسة قامت من مكانها وجاية بفضول واستنكار عشان تفهم ليه العريس سايب بنتها وواقف يتخانق مع أمه وسلايفه، جوزي حاول يسكتنا تاني، بس العريس مد إيده وزق أخوه وقال: “سيبهم يتكلموا! كفاية نفاق بقى! أنا تعبت في الغربة سنين وشقيت عشان لما أرجع أعمل فرح يلمنا، مش عشان أمي تفضحنا وتكسر نفوس الناس عشان تتباهى هي بالفلوس والمظاهر!”

العريس بص لأمه وقالها كلمة كسرت جبروتها كله: “طلعي الفلوس اللي في الشنطة يا أمي، أو قولي الحقيقة قدام إخواتي دلوقتي حالا!”

حماتي لما لقت كل الأقنعة وقعت، وإن ابنها اللي جاي من الكويت واللي كانت بتعتمد إنه هيسكت عشان ميكسرش فرحته وقف في وشها، وشها بهت والغل بان في عينيها، رمت الشنطة على الترابيزة وقالت وهي بتجز على سنانها: “أيوه أخدت الفلوس! هو فلوس مين دي مش فلوس ابني؟! ولا هما الغرب أولى بيها مني؟! ييجوا يلبسوا