شهادة حق ج 1 حكـايات مني السيد حصري

الحكاية بدأت من يوم الجمعة، يوم العزومة الأسبوعية في بيت العيلة الكبير. سلفتي منــ,,ـــــار دخلت المطبخ مبتسمة، شايلة كيس سمك بلطي كبير وطازة، ريحته تفتح النفس. بصتلي وقالت بود يا سمر، عشان نخلص بدري قبل ما الرجالة يرجعوا من الصلاة، اطلعي إنتِ بالصينية واشوي السمك في فرن السطوح، وأنا هقف هنا أطبخ الرز بالبصل وأعمل السلطة الخضرا.

ابتسمت لها وقلت من عيني يا منــ,,ـــــار. خدت الصينية وطلعت. فوق السطوح، ولعت الفرن وسبته يسخن، وحطيت الصينية على ترابيزة خشب قديمة جنب السور. وبعدها اكتشفت إني نسيت الولاعة والقماشة اللي بمسك بيها الصاج. نزلت خمس دقايق بس أجيبهم. لكن لما طلعت تاني، شفت منظر شل حركتي.

قطة شارع سودة كانت واقفة فوق الترابيزة، غارزة سنانها ومخالبها في تلات سمكات كبار، بتنهش فيهم ومبهدلاهم بشكل مقزز. اتجمدت مكاني. فضلت أبص للسمك وبعدين أبص حواليّا، وعقلي بيلف بسرعة. أقول إن السمك باظ؟ لكن حماتي لسانها متبري منها، وأول كلمة هتقولها إني مهملة ومبعرفش أشيل مسؤولية حاجة، وهتمسكها عليا ذلة العمر.

وفي اللحظة دي، الخوف عماني. الشيطان وسوسلي ارميهم في الزبالة… الباقي كتير، محدش هيعد ولا هيركز. وبالفعل، رميت السمك اللي القطة أكلت منه في الزبالة، ونضفت الصينية، وشويت الباقي. نزلت السمك وأنا إيديا بتترعش من التوتر. كنت فاكرة إن الموضوع خلص.

ماكنتش أعرف إن اللي رميته في زبالة السطوح هيبقى سبب في خراب بيت كامل. دخلت حماتي المطبخ عشان تغرف وتقسم المنابات زي عادتها، وبمجرد ما بصت على السمك، صوتها هز البيت إيه ده يا منــ,,ـــــار؟! هو ده السمك اللي قولتلك هاتي تلاتة كيلو منه؟

! جايبالي شوية ميجوش اتنين كيلو بالعافية؟! بتستخسري فينا وفي عيال سلفك وبتوفري لبيتك من ورانا؟! منــ,,ـــــار اتصدمت وقالت والله يا ماما شرياه ووزناه بنفسي تلاتة كيلو، والله ما نقصت منه سمكاية واحدة! لكن حماتي ماصدقتهاش. فضلت تعلي صوتها وتتهمها بالنصب والسرقة، لحد ما قالت قدام الكل إنتي كدابة ونصابة!

وبتقبلي الحرام والنصب على نفسك وعلى عيالك! دموع منــ,,ـــــار نزلت، وحاولت تدافع عن نفسها، لكن كل كلمة كانت بتخلي حماتي تعصب أكتر. وأنا؟ كنت واقفة في مكاني زي الحيطة. لساني اتشل. ريقي نشف. كنت عارفة الحقيقة كاملة، لكن خوفي خلاني أبص في الأرض وأسكت. سكت.