أول ست شهور في جوازي ج 2حكايات منــال عـلـي

الجزء الثاني
أول ما مسكت إيدها…
بصتلي بصدمة.
واضح إنها ما كانتش متخيلة إني في يوم هقف قدامها.
قالت وهي بتحاول تشد إيدها
سيبي إيدي.
قولتلها وأنا بصالها في عينها
هسيبها… أول ما تبعدي عن حاجتي.
زقتني جامد وهي بتقول
إنتي اتجننتي؟!
قولتلها
لا… أنا فوقت.
ست شهور وأنا ساكتة.
كل مرة أقول معلش.
كل مرة أقول دي أخت جوزي.
لكن واضح إن سكوتي اتفهم غلط.
صوتنا ابتدى يعلى.
وفي ثواني…
لقيت حماتي طالعة على السلم وهي بتجري.
أول ما شافتنا قالت
في إيه؟!
أخت جوزي ما استنتش ثانية.
جريت

عليها وقالت
شوفي مرات ابنك عملت فيا إيه!
بتمنعني أخد براد من بيت أخويا.
حماتي بصتلي باستغراب وقالت
هو صحيح الكلام ده؟
قولتلها بهدوء
أيوه صحيح.
أنا اللي منعته.
اتغيرت ملامح وشها.
وقالت
وليه يعني؟
قولتلها
لأن كل البرادات اللي قبله باظوا.
وده آخر واحد عندي.
سكتت شوية…
كنت مستنية إنها تقول لأختها
طالما بوظتيهم هاتي غيرهم.
لكن اللي حصل كان العكس.
قالتلي
يا بنتي… ما هو براد.
هتعملي عليه كل المشكلة دي؟
ابتسمت بوجع.
وقولتلها
ما هو لو براد واحد كنت سكت.
دول أربعة.
وأكتر من حاجة غيرهم.
أخت جوزي قاطعتني وقالت
يعني أنا حرامية؟
قولتلها
أنا ما قولتش كده.
أنا بقول إنك كل مرة بتاخدي حاجة… بترجع بايظة.
ودي حقيقة.
حماتي قالت بعصبية
يا بنتي كبرّي دماغك.
دي أخت جوزك.
قولتلها
وأنا عمرى ما رفضتلها حاجة.
بس خلاص…
كفاية لحد كده.
فجأة…
أخت جوزي مدت إيدها ومسكت البراد من على الرخامة بسرعة.
وقالت
أنا هاخده يعني هاخده.
شدّيته من إيديها.
وقالتلي
سيبيه.
قولتلها
لأ.
الشد بينا زاد.
وفي ثانية…
البراد وقع على الأرض.
صوت وقوعه دوّى في الشقة.
واتجمدنا إحنا التلاتة.
بصيت عليه.. .
ولقيته اتعوج واتخبط جامد.
قلبي وقع.
كان أول مرة أستخدمه…
وأول مرة ينزل من مكانه.
رفعت عيني عليها.
لقيتها بتبصلي بنظرة كلها تحدي.
وبدون أي ذرة ندم قالت
أهو…
لا أنا خدته…
ولا إنتِ عرفتي تحافظي عليه.
الكلمة دي حرقت دمي.
لكن اللي وجعني أكتر…
إن حماتي بصت للبراد ثانيتين…
وبعدين بصتلي أنا.
وقالت الجملة اللي عمري ما هنساها
كل ده بسبب عندك… لو كنتي سمعتي الكلام من الأول، ما كانش ده حصل.
في اللحظة دي… حكايات منال علي
حسيت إني واقفة لوحدي.
ولا حد شايف حقي.
ولا حد حاسس بيا.
لكن اللي ما كنتش أعرفه…
إن جوزي كان طالع السلم في نفس اللحظة…
وسمع آخر جملة قالتها أمه…
يتبع